(ABANTE) Hindi umano makakaapekto sa kanyang trabaho bilang senador ang bribery conviction na ipinataw sa kanya ng Sandiganbayan.
Ito ang sinabi ni Senador Jinggoy Estrada dahil hindi naman umano ‘final and executory’ ang desisyon ng anti-graft court.
“Hindi pa naman final and executory yung ruling ng Sandiganbayan. Marami pang remedies available for me. Katulad ng motion for reconsideration, kung kinakailangan, pwede pang umakyat sa Korte Suprema,” sabi ni Estrada sa panayam sa DWIZ.
“So hindi makakaapekto ito. Ipagpapatuloy ko pa rin yung aking trabaho bilang senador. At syempre yung mandato na binigay sa akin ng taumbayan,” dagdag niya.
Noong Biyernes, hinatulan ng Sandiganbayan Fifth Division si Estrada ng 11 taong pagkakakulong dahil sa direct at indirect bribery subalit pinawalang sala naman sa kasong plunder kaugnay ng kanyang pagkakasangkot sa pork barrel fund scam.
Maliban kay Estrada, absuwelto din Janet Lim-Napoles P183-million Priority Development and Assistance Fund (PDAF) scam dahil sa kawalan ng ebidensiya.