(INQUIRER) Tinitingnan ni Senator Jinggoy Estrada na mas mabigat na kaparusahan sa mga mapapatunayang guilty sa “game-fixing” sa anumang professional o amateur sporting events sa bansa.
“It is imperative that we uphold the true spirit of fair play and athletic excellence, preserving and protecting the integrity of sports activities against dishonesty and corrupt practices,” banggit ni Estrada sa katatapos na 2023 Philippine Professional Sports Summit.
Aniya layon nito na mas maging malawak at malinaw ang kahulugan ng “game-fixing” o kahit anong hakbang na makakaapekto sa resulta ng laro sa pamamagitan ng sugal o taya.
Paliwanag pa niya na ang pagpapalitan ng pera ay ituturing ng “prima facie evidence.”
Ang mga lalabag ay maaring maharap sa pagkakakulong na tatlo hanggang 12 taon at multa mula P1 milyon hanggang P5 milyon.
Habambuhay na pagkakakulong at multa ng P10 milyon hanggang P50 milyon ang maaring ipataw kung ang nilitis ay miyembro ng sindikato.
Ang mga professional players na mahuhuli ay hindi na maaring makapaglaro ng anumang uri ng sports kapag napatunayan ang kanyang pagkakasala.